जब तिमी

जब तिमी रिसाउँछौ
सोच्छु अब म टाढा जान्छु
धेरै नजिक भएँ
तिमीलाई धेर भएँ

जब गालि गर्छौ
सोच्छु बोल्दिन कहिल्यै
अति धेरै पोखिएँ
तिमीलाई पुग्यो

जब बेवास्ता गर्छौ
सोच्छु म व्यर्थ छु
यति आफ्नी भएँ
कि पराइ भएँ

जब टाढा जान्छौ
सोच्छु रित्तिएँ अब
जति बाँच्नु बाँचें
अब पलायन हुन्छु

तर एकपटक फर्कियौ भने फेरी
म यति डुब्छु कि बिर्सन्छु सबै
उसैगरी तिमी मै समर्पित हुन्छु
चाहिंदैन मलाई अरु केही पनि

जब हाँसी दिन्छौ फूल फुल्छ मनमा
नजिक आई दिन्छौ जून खेल्छ मनमा

के जादु होला तिमीभित्र त्यस्तो
कुन शक्तिले तान्छौ मलाई यसरी
तिमी बाहेक अर्को संसार नै छैन
भन तिमीबीना म बाँचुँ कसरी